KUJDES FAQJA QË PO SHIKONI ËSHTË NË FAZËN E NDËRTIMIT!!!!

Tuesday, 28 October 2014

Shenjtërimi i Kishës se re Katedrale të Shën Dhimitrit në Berat

KISHA ORTHODHOKSE AUTOQEFALE E SHQIPËRISË
NJOFTIM PER SHTYP
Shenjtërimi i Kishës se re Katedrale të Shën Dhimitrit në Berat

     “Çdo kishë orthodhokse është vend paqeje, ngushëllimi, vend, ku njerëzit gjejnë jo vetëm Perëndinë, por edhe veten e tyre. Njëkohësisht është vend vëllazërimi, ku takohemi me respekt me njëri-tjetrin. Për më tepër, është vend ripërtëritjeje shpirtërore dhe shenjtërimi. Vend lavdërimi i Perëndisë, ku bashkekzistojnë e vërteta, dashuria dhe bukuria. Kisha e re Katedrale e Beratit, ndërsa lartësohet në qendër të qytetit, përbën mushkërinë e tij kryesore.”
     Duke theksuar me këto fjalë rëndësinë e kishës së hirshme për jetën e besimtarëve, Kryepiskopi i Tiranës, Durrësit dhe i Gjithë Shqipërisë, Anastasi, shenjtëroi ditën e diel, 26 tetor 2014, në të kremten e Shën Dhimitrit, Kishën e re Katedrale të Beratit, që i kushtohet këtij shenjtori të Kishës sonë. Në Shërbesën e Shenjtërimit morën pjesë Mitropoliti i Beratit, Hirësia e Tij Ignati, Episkopi i Amantias Nathanaili dhe shumë klerikë.
     Që herët në mëngjes dhjetëra e dhjetëra besimtarë, mes tyre shumë të rinj, nga qyteti antik dhe me tradita të veçanta në besimin orthodhoks, por dhe e gjithë zona e Myzeqesë dhe nga zona të tjera të vendit, kishin mbushur oborrin e Kishës, duke marrë pjesë me lutjen e tyre në aktin e hirshëm të Shenjtërimit, me litaninë e lipsaneve të shenjta dhe në vazhdim, me shenjtërimin e Tryezës së Shenjtë dhe në Liturgjinë Hyjnore. Në shërbesa morën pjesë edhe përfaqësues të komuniteteve fetare, autoriteteve lokale, deputetë të zonës etj.
     Katedralja e re e ndërtuar mjeshtërisht, me sipërfaqe totale 527 m2 dhe lartësi 22 m, u themelua në vitin 1994, mes shumë vështirësish dhe në një kohë kur qyteti i Beratit ishte goditur nga një epidemi kolere. Nisi të ndërtohet në vitin 2002, me projektin arkitektonik dhe supervizimin e Zyrës Teknike të Kishës Orthodhokse Autoqefale të Shqipërisë. Shpenzimet për përfundimin e kësaj vepre arritën në 850.000 euro, fonde që erdhën si donacione nga burime të ndryshme jashtë vendit, me përkujdesjen personale të Kryepiskopit Anastas.
     Nga muaji qershor deri në tetor të vitit 2014, janë shenjtëruar shtatë kisha të shenjta, në zona të ndryshme të Shqipërisë, të cilat zbukurojnë vendin dhe transmetojmë mesazhe besimi e shprese: dy në Tiranë, në Shkodër, Pogradec, Aliko, Këlcyrë dhe Berat. 
Tiranë 28.10.2014

      Foto: Dhjakon Stefan Ritsi

  

Saturday, 18 October 2014

Filloi viti i ri mësimor në Akademinë Teologjike “Ngjallja e Krishtit”

   Me Shërbesën e Bekimit të Ujit (Ajazmën), në 13 tetor, nisi viti i ri mësimor për studentët në Akade-minë Teologjike “Ngjallja e Krishtit”. Kjo shërbesë u krye nga Episkopi i Apollonisë Nikolla, në prani të Episkopit të Bylisit Asti, pedagogëve, stafit dhe të studentëve. Hirësi Nikolla përcolli tek të pranishmit edhe bekimet dhe urimet më të mira nga ana e Kryepiskopit Anastas, për fillim të mbarë, të bekuar dhe krijues. Një urim i veçantë dhe një mirëseardhje e ngrohtë u bë edhe për 16 studentët e rinj të vitit të parë, të cilët u zgjodhën me konkurrim mes një grupi të madh kandidatësh.
 
   Shpresohet se edhe ky do të jetë një vit frytdhënës, me pasurimin e mëtejshëm të mësimdhënies, për një formim teologjik të plotë dhe një formim shpirtëror sa më të lartë, në dobi të komunitetit të Kishës. Secili nga studentët e ka mundësinë të përparojë në këtë drejtim, në sajë të kushteve të krijuara, mjediseve funksionale, bibliotekës së pasur me libra kishtarë dhe të fushave të tjera dhe veçanërisht me pjesëmarrjen e përkushtuar në shërbesat, të gjitha të zhvilluara brenda një mjedisi familjar e të ngrohtë. Kështu, nëpërmjet studimit të teologjisë, përjetimit liturgjikal e shpirtëror dhe jetës komunitare bëhet  e mundur arritja e qëllimit parësor, përgatitja e një brezi klerikësh e laikësh me nivel gjithnjë e më të lartë, për t’i shërbyer besimtarëve dhe për të plotësuar nevojat për klerikë.
 
Dhimitër Qosja
Pedagog në Akademinë Teologjike “Ngjallja e Krishtit”
 
 

Wednesday, 15 October 2014

Konferencë me bashkëshortet e klerikëve orthodhoksë të Shqipërisë

NJOFTIM PËR SHTYP
Konferencë me bashkëshortet e klerikëve orthodhoksë të Shqipërisë

Tetëdhjetë bashkëshorte priftërinjsh dhe dhjakonësh, nga Kryepiskopata dhe tri mitropolitë e Kishës Orthodhokse Autoqefale të Shqipërisë, morën pjesë në konferencën treditore, të ndara në dy grupe, më 1-3 dhe 3-5 tetor, në Skitën e Miroprurësve - Manastiri i Ri i Shën Vlashit, Durrës. Tema e konferencës ishte: “Maria dhe Marta, nxënëse dhe shërbyese”.   Në këtë aktivitet ishin ftuar nga Kryepiskopi Anastas shtatë gra orthodhokse nga SHBA, kryesisht presvitera, të cilat folën për temën.
Nga qëllimet kryesore të konferencës ishte të jepej kohë dhe mundësi për komunikim dhe informim më të mirë për vendin e priftëreshave dhe dhjakoneshave në ambientin orthodhoks. Gjithashtu, u zhvilluan dhe u diskutuan temat: “Martesë e shëndoshë, shërbesë e shëndetshme”, “Gratë në Kishë”, “Duke rritur fëmijët brenda Kishës”, “Përballimi i krishterë i konflikteve”. Ky takim drejtohej nga presvitera nga SHBA Urani Ritsi.
Kryepiskopi Anastas falënderoi priftëreshat dhe dhjakoneshat për kontributin e tyre të deritanishëm, theksoi rolin e rëndësishëm që ato kanë në Kishë dhe veçanërisht çfarë duhet të kenë parasysh që të përmbushin siç duhet përgjegjësitë e tyre.
Pjesë e takimit ishin koha për lutje, Shërbesat e Mëngjesores, Mbrëmësores, Himni Akathist, Paraklisi i Hyjlindëses, Liturgji Hyjnore, psalmodi e përbashkët, madje edhe orë argëtimi me këngë tradicionale. Në fund, priftëreshave dhe dhjakoneshave, iu dhuruan disa libra mes të cilëve edhe libri i Kryepiskopit Anastas “Udhëtim shpirtëror”, që është ndihmë e vyer për mësimet e katekizmit. Të gjitha pjesëmarrëset në këtë takim shprehën falënderimin e tyre të ngrohtë për këtë mundësi që u ofroi Kisha.
7 tetor 2014
Zyra e Shtypit e Kryepiskopatës

Monday, 13 October 2014

U zhvillua Asambleja e Lidhjes së Intelektualëve Orthodhoksë

KISHA ORTHODHOKSE AUTOQEFALE E SHQIPERISE
Tiranë, 13 tetor 2014
Njoftim Shtypi
U zhvillua Asambleja e Lidhjes së Intelektualëve Orthodhoksë  
   Të ardhur nga qytete të ndryshme të vendit, mbi 400 të diplomuar të shkollave të larta, anëtarë aktivë të Kishës Orthodhokse Autoqefale të Shqipërisë, u mblodhën të shtunën, 11 tetor, në sallën e Qendrës Kulturore të Katedrales së Tiranës “Ngjallja e Krishtit”, në Asamblenë e Lidhjes së Intelektualëve Orthodhoksë të Shqipërisë. Lidhja funksionon në kuadrin e Statutit të Kishës Orthodhokse Autoqefale të Shqipërisë dhe ka për qëllim kultivimin shpirtëror të anëtarëve të saj, zhvillimin e marrëdhënieve ndërpersonale, dëshminë e së vërtetës Orthodhokse, shërbimin social, për mbështetjen e njerëzve në nevojë etj.

Fjalën e hapjes e mbajti Kryepiskopit Anastas, i cili foli rreth temës “Kërkimi fetar në Evropë. Rëndësia e pakicave krijuese”. Në të ndër të tjera u theksua se “…Që Kisha Orthodhokse t’i përgjigjet rolit historik të saj dhe që të kontribuojë në ecurinë shpirtërore të Shqipërisë dhe më gjerë të Evropës, nevojitet para së gjithash që të jetë besnike ndaj karakterit të saj misterial-sotiriologjik.  Të mbetet ajo që është në thelb “Arka e së vërtetës”, - të cilën e zbuloi Perëndia Triadik- shfaqja e misterit të ekonomisë së Perëndisë në Krishtin me anën e Shpirtit të Shenjtë. Vendi ku kryhet metamorfoza e njeriut, kapërcimi i ankthit ekzistencial, bashkimi i tij me Perëndinë e dashurisë. Këtë Orthodhoksi duhet të përfaqësojmë në Shqipëri dhe në tërë botën. Le të mos shqetësohemi pse nuk bëjmë pjesë në shumicën. Ajo që kërkohet është të bëhemi një bërthamë krijuese, që do të ndihmojë vendin tonë, që do të zbulojë dhe do të zhvillojë elementët më të mirë të trashëgimisë evropiane si dhe do të ecë drejt një lulëzimi të ri shpirtëror.”  
    Në pjesën e dytë të veprimtarisë u mbajtën disa referate nga anëtarë të Lidhjes së Intelektualëve Orthodhoksë: Nga Prof. dr. Robert Andoni “Mjekë të shquar orthodhoksë”; nga Anastasia Pite “Gruaja Orthodhokse dhe besimi”, nga Prof.as dr. Pirro Prifti “Veçori të bashkëjetesës fetare” dhe nga Dr. Dritan Shano “Zhvillimet ekonomike dhe sfidat me të cilat përballemi”. Veprimtaria vijoi me diskutime, ku u bënë propozime konkrete për veprimtarinë e ardhshme të Lidhjes.
Në kuadrin e Asamblesë, u bë zgjedhja e anëtarëve të Këshillit Ekzekutiv të saj, me procedura krejtësisht transparente,  nga një listë kandidatësh që u propozuan drejtpërdrejt nga anëtarët e Lidhjes gjatë procesit të votimit (të ndarë në 4 grupe, të Kryepiskopatës dhe të 3 Mitropolive).
    Gjatë kohës së mbajtjes së referateve përfundoi numërimi i votave dhe më pas u bënë të ditura rezultatet. Në Këshillin Ekzekutiv u zgjodhën 4 anëtarë nga Kryepiskopata dhe 3 anëtarë për çdo Mitropoli (nga 13 anëtarët 8 janë burra dhe 5 janë gra).
     Lidhja shprehu qartë nevojën e pjesëmarrjes aktive dhe krijuese të Orthodhoksëve që kanë formim universitar në jetën e Kishës sonë, brenda shoqërisë bashkëkohore shqiptare.
Zyra e Shtypit
e Kishës Orthodhokse Autoqefale të Shqipërisë


Predikimi i së Dielës 4 Llukait, nga Episkopi i Krujës, Andoni, Tiranë, dt. 12.10.2014